Hin vinsælu jólatré frá Vallanesi verða til sölu á jólamarkaðnum Ingólfstorgi frá 14:00 til 18:00 alla daga og 14:00 til 20:00 frá 15.desember fram til jóla eða meðan birgðir endast. Við bjóðum sem áður mikið úrval af stafafuru en núna einnig greni og síðan gjafakörfur með úrvali af framleiðslu Móður Jarðar.

Gestum og gangandi gefst að smakka ýmsar vörur og hver veit nema Þörusleikir hendi í nokkarar lummur ef liggur vel á honum.

Núna geta viðskiptavinir Móður Jarðar glaðst yfir nýrri vöru sem er tilbúin kornblanda til að gera úr lummur, vöfflur eða brauð. Lífrænt ræktað bygg og heilhveiti frá Vallanesi er uppistaðan í þessari blöndu sem einfaldar mjög þá aðgerð að henda í lummur eða vöfflur þegar gesti ber að garði.

Hellið innihaldi pokans í skál og bætið í það u.þ.b. 4  dl af vökva og einu eggi (má sleppa), 2 msk olíu og  hunangi eftir smekk. Vökvinn má vera t.d. vatn, mjólk, Ab mjólk, bjór, blanda af þessu eða annað eftir smekk.  Hrærið öllu saman og stillið af vökvann þannig að deigið flæði vel á pönnunni. Gott er að gera deigið með góðum fyrirvara, a.m.k. 15 mín. þannig að þurrefni og vökvi samlagist vel.  Best er að blanda það kvöldið áður og skal þá nota 4,5 dl af vökva og geyma í kæli. Úr uppskriftinni koma um 20 lummur eða 9 vöfflur. Til að gera brauð úr blönduni má setja í hana 3,5 dl af Ab mjólk og 2 msk olíu.

Hrærið deigið lauslega saman og mótið með skeið í litlar kúlur og raðið þeim þétt saman á plötu og bakið í  35 mín. við 200°c. (Stækka má brauðið með t.d. 2 dl af hveiti og 0.5 dl vökva). Tilvalið er að gera lummur í glæsilegan dögurð á aðventunni með ostum, reyktum silungi eða agave sýrópi og spældu eggi.

Innihald: Heilhveiti, hveiti, byggmjöl, byggflögur, rúsínur, sólblómafræ, vínsteinslyftiduft, sjávarsalt.

Easy pancake & waffle mix made with Icelandic barley and whole wheat flour.

Mix contents with 4dl of water, milk or beer and 1 egg (egg is not necessary, 2 tbsp oil and 1-2 tbsp honey.

Stir together and allow standing for at least 15 minutes before frying in a pan in a little oil.  
This recipe makes around 20 delicious pancakes or 9 waffles, full of fiber.      
Certified Organic.

MatAskur ehf er nýtt sprotafyrirtæki í eigu Borghildar Sverrisdóttur einkaþjálfara.  Fyrsta vörulína MatAsks er HeilsuAskur og nú í byrjun nóvember kemur FerðaAskur á markað.  Þriðja vörulínan er svo SælkeraAskur og þar munu margar vörur Móður Jarðar passa vel inn.

HeilsuAskur sækir hráefni sín til Móður Jarðar sem gaf HeilsuAski leyfi til að framleiða Gabríelsgrautinn í fyrsta sinn fyrir neytendur.  Þá notar HeilsuAskur byggflögur í morgungraut sem kallaður er Eymi, eftir bóndum sjálfum.  Að auki innihalda margir réttir  og ýmiskonar meðlæti HeilsuAsks hráefni frá Móður jörð. Sjá nánar um máltíðir HeilsuAsks hér.

HeilsuAskur inniheldur allar máltíðir dagsins og byggir hver HeilsuAskur á orkuþörf hvers og eins. Við notum vísindalega reikniformúlu til að reikna út orkuþörf hvers einstaklings byggt á hæð, þyngd, kyni, aldri, vikulegri hreyfingu og hvort viðkomandi ætli sér að grennast eða standa í stað í þyngd.

FerðaAskur er sérútbúið nesti fyrir útivistarfólk, hvort sem farið er í dagsferð eða lengri ferðir s.s. göngur, hestaferðir, jeppaferðir, veiði eða aðra útivist, hvort sem ferðirnar eru á eigin vegum eða með leiðsögn. Viðskiptavinir kaupa eins marga FerðaAska og  dagafjöldi ferðarinnar er og mismunandi stærðir FerðaAska byggist á því að allir fá velútlátið nesti miðað við sína orkuþörf.  Morgungrautarblöndur FerðaAsks innihalda byggflögur frá Móður Jörð.

Móðir Jörð verður með kynningu á sýningunni MATUR-INN 2011 í Íþróttahöllinni á Akureyri um komandi helgi 1. og 2. október.Sýningin verður opin kl. 11-17 bæði laugardag og sunnudag.
Þetta er sölusýning með á fjórða tug þátttakenda, fag- og leikmannakeppnir í matreiðslu - ókeypis aðgangur!
Verið velkomin að smakka á vörum Móður Jarðar og spjalla við Eygló og Eymund sem standa vaktina.

Núna hefur gamla mjólkurhúsið sem byggt var 1979 fengið nýtt hlutverk. Það hefur verið dubbað upp í sparifötin og eru þar tvö herbergi, annað með koju og hitt með hjónarúmi og eldhúskrók.

Mjólkurhúsið í Vallanesi er kjörinn staður fyrir þá sem vilja komast í návígi við Móður Jörð, njóta útiveru og jafnvel fá að uppskera ferskt grænmeti sér til matar.                            

Hægt er að leigja þessa aðstöðu með uppbúnum rúmum eða sem svefnpokapláss.

Uppskera er nú loks hafin í Vallanesi eftir langt og kalt vor. Fyrsta sending af grænkáli, salati og steinselju er komin í verslanir og fljótlega bætast við fleiri tegundir.

Við erum félagar í Beint frá býli og bjóðum nágranna og alla ferðalanga velkomna að kíkja til okkar og kaupa grænar og gómsætar afurðir.